ललितपुर । ललितपुर सुनचाँदी व्यवसायी संघ र बि.एण्ड बि. हस्पिटल प्रा.लि.बीच आपसी सहकार्यलाई सुदृढ बनाउने उद्देश्यसहित समझदारी पत्र (MOU) मा हस्ताक्षर गरिएको छ। एक कार्यक्रमका बीच सम्पन्न उक्त सम्झौताले संघका सदस्यहरू तथा उनीहरूको परिवारलाई स्वास्थ्य उपचार सेवामा सहुलियत तथा विशेष सुविधा प्रदान गर्ने लक्ष्य लिएको छ।
सम्झौताअनुसार अब संघमा आबद्ध व्यवसायी तथा उनका परिवारजनले बि.एण्ड बि. हस्पिटलमा विभिन्न स्वास्थ्य सेवामा सहुलियत दरमा उपचार पाउने व्यवस्था मिलाइनेछ। यसले व्यवसायी समुदायको स्वास्थ्य सुरक्षामा सकारात्मक योगदान पुर्याउने विश्वास गरिएको छ।
दुवै संस्थाबीचको सहकार्यको पहिलो चरणअन्तर्गत यही २६ गते संघको सचिवालय भवनमा बृहत् स्वास्थ्य शिविर तथा रक्तदान कार्यक्रम आयोजना गरिने भएको छ। कार्यक्रममा निःशुल्क स्वास्थ्य परीक्षण, परामर्श सेवा तथा रक्तदानजस्ता सामाजिक कार्यहरू सञ्चालन गरिने जनाइएको छ।
संघले यस्तो सहकार्यबाट आफ्ना सदस्यहरूको स्वास्थ्य हितलाई प्राथमिकतामा राख्दै भविष्यमा समेत यस्ता कार्यक्रमलाई निरन्तरता दिने जनाएको छ। साथै, बि.एण्ड बि. हस्पिटलले पनि सामाजिक उत्तरदायित्वअन्तर्गत यस्ता सहकार्यलाई अझ विस्तार गर्ने प्रतिबद्धता व्यक्त गरेको छ।
