ललितपुर कार्तिक ९ -ः मुछें आगमघरसँग सम्बन्धित ऐतिहासिक श्री मानमानेश्वरी भवानी जात्रा तथा खड्ग (पायोः) जात्रा सफलतापूर्वक सञ्चालन गरी सम्पन्न गरेको अवसरमा जात्राका अध्यक्ष साम्राज्यदेव श्रेष्ठलाई नेवाः पत्रकार राष्ट्रिय दबूका केन्द्रिय अध्यक्ष नृपेन्द्रलालले खादा ओढाएर सम्मानपत्र प्रदान गर्नु भयो।
परम्पराअनुसार कोजाग्रत पूर्णिमाका दिन जात्रा सफलतापूर्वक सम्पन्न भएको शुभ अवसरमा आयोजना गरिने विशेष पूजामा प्रसाद ग्रहण गर्ने क्रममा अध्यक्ष श्रेष्ठलाई सम्मान गरिएको हो।
श्री मानमानेश्वरी भवानी जात्रा तथा खड्ग (पायोः) जात्रा ललितपुरको ऐतिहासिक, धार्मिक तथा सांस्कृतिक महत्त्व बोकेका मौलिक परम्पराहरू हुन्। पुस्तौँदेखि चल्दै आएका यी जात्रा सञ्चालन तथा व्यवस्थापनमा संलग्न हुँदै परम्परालाई निरन्तरता दिन योगदान पुर्याएको कदरस्वरूप अध्यक्ष श्रेष्ठलाई सम्मानपत्र प्रदान गरिएको हो।
मुछें आगमघरमा विराजमान श्री मानमानेश्वरी भवानीसँग सम्बन्धित धार्मिक विधि, पूजाआजा तथा जात्राले स्थानीय समुदायको धार्मिक आस्था, सांस्कृतिक पहिचान र ऐतिहासिक परम्परालाई जीवन्त राख्दै आएका छन्। यस्ता जात्रा तथा पर्वहरू नेवाः समुदायको अमूर्त सांस्कृतिक सम्पदाका महत्त्वपूर्ण अङ्गसमेत हुन्।
नेवाः पत्रकार राष्ट्रिय दबूद्वारा प्रदान गरिएको सम्मानले ऐतिहासिक जात्रा सञ्चालनमा नेतृत्वदायी भूमिका निर्वाह गर्ने व्यक्तित्वहरूको योगदानको कदर गर्नुका साथै मौलिक संस्कृति, परम्परा र सम्पदाको संरक्षण तथा प्रवर्द्धनमा सकारात्मक सन्देश दिने अपेक्षा गरिएको छ।
धार्मिक तथा सांस्कृतिक परम्पराको संरक्षण, पुस्तान्तरण र प्रचारप्रसारमार्फत नयाँ पुस्तालाई आफ्नो मौलिक पहिचानसँग जोड्न यस्ता सम्मान तथा प्रोत्साहनले महत्त्वपूर्ण भूमिका खेल्ने विश्वास गरिएको छ।
