कला तथा संस्कृति महोत्सवको अवसरमा हस्तकला प्रदर्शनी आयोजना गरिने
नेपाल हस्तकला महासंघद्वारा ललितपुर महानगरपालिकाको सहयोगमा कला तथा सांस्कृतिक महोत्सव २०८२ (Craft & Culture Festival 2025) को अवसरमा नेपाली कला र संस्कृतिको परिचायकको रूपमा रहेका हस्तकला वस्तुको प्रचार प्रसार एवं प्रवर्द्धन गर्ने उद्देश्यबाट ललितपुर महानगरपालिका स्थित पाटन दरवार स्क्वायर क्षेत्र र पाटन संग्राहलय परिसरमा हस्तकला प्रदर्शनी आयोजना गरिने भएको छ ।
यस महासंघ र ललितपुर महानगरपालिका वडा नं १६ हस्तकला तथा पर्यटन विकास समिति तथा पाटन संग्रहालयको संयुक्त तत्वाबधानमा हुने उक्त हस्तकला प्रदर्शनीमा करिब २१ वटा Canopy र १० वटा टेबुल स्टल रहने छन् । प्रदर्शनीमा विभिन्न विधाका हस्तकला वस्तुहरुको अलाबा ललितपुर महानगरपालिका वडा नं १६ को हस्तकला प्रवर्द्धन समितिबाट बुद्ध धर्म अनुसार दश कर्ममा प्रयोग हुने गरगहना प्रदर्शनी, जातिय पोशाक प्रदर्शनी र सोही वडाको सास्कृतिक समितिबाट सास्त्रिय संगीत, विभिन्न विधाका चर्या नृत्य, अष्टमात्रिका नाच, कार्तिक नाच, लोकनृत्य लगायत धाः बाजा, दमोखिं बाजा नेपाल भाषाका लोकगीत लगायतको प्रस्तुति गरिने छ भने महासंघबाट कोरिया स्थित IMACO को सहकार्यमा मुखौटा प्रदर्शनी गर्ने कार्यक्रम पनि रहेको छ। उक्त मुखौटा प्रदर्शनीमा नेपालका ६० वटा र दक्षिण कोरियाको ४० वटा मुखौटा प्रदर्शनी गरिने छ। यही २०८२ मंसिर १७ गते बुधबार देखि मंसिर २१ गते आइतबारसम्म सञ्चालन गरिने उक्त प्रदर्शनी प्रत्येक दिन बिहान १० बजेदेखि साँझ ७ बजेसम्म सञ्चालन हुने छ । प्रदर्शनीमा प्रदर्शनकती तथा आगन्तुकहरूको सुविधाको लागि नेवारी मौलिक खाद्य परिकारका ३ वटा स्टलहरु पनि राखिने छ ।
बागमती प्रदेश सरकारको उद्योग, वाणिज्य, भूमि तथा प्रशासन मन्त्री माननीय श्री विन्दु श्रेष्ठबाट २०८२ मंसिर १७ गते बुधबार दिनको १ बजे एक समारोहका बीच ललितपुर दरबार स्क्वायर स्थित कार्तिक डबलीमा कार्यक्रमको समुद्घाटन सम्पन्न गरिने कार्यक्रम रहेको छ। आम जनसमुदायको लागि प्रदर्शनी अवलोकन गर्न निःशुल्क प्रवेशको व्यवस्था रहेको छ ।
विश्व कला परिषद्बाट कला नगरी घोषित ललितपुरको मुटु पाटन दरबार स्क्वायर क्षेत्रमा हुने यस कार्यक्रमको आफ्नै विशिष्ट पहिचान र महत्व रहेको छ ।
रविन्द्र शाक्य अध्यक्ष
