ललितपुर भाद्र २२ – ललितपुर महानगरपालिकाले ऐतिहासिक न्हुः पोखरी संरक्षण तथा पुनर्निर्माणको क्रममा लगनखेलस्थित पञ्चायतकालीन घर टहरा डोजर लगाएर भत्काएको छ।
महानगरपालिकाले २०८२ साउन १७ गते सार्वजनिक सूचना जारी गर्दै न्हुः पोखरीको उत्तरी–पूर्वी किनारामा अनाधिकृत रूपमा बनेका संरचना ३५ दिनभित्र हटाउन निर्देशन दिएको थियो। सूचना अवधी सकिएपछि शनिबार (२०८२ साउन १८ गते) डोजर प्रयोग गरी संरचना हटाइएको हो।
न्हुः पोखरी नेपाल सरकारको नाममा दर्ता रहेको ललितपुर महानगरपालिका वडा नं. १ (क) को कित्ता नं. १०५ मा अवस्थित छ। परापूर्वकालदेखि ऐतिहासिक महत्त्व बोकेको यो पोखरी पछिल्ला वर्षहरूमा अनाधिकृत संरचना निर्माणका कारण अस्तित्व संकटमा परेको भन्दै महानगरले संरक्षण र जिर्णोद्धार योजना अघि बढाएको हो।
महानगरले तयार पारेको रोना प्रतिवेदन (DPR) नगर कार्यपालिकाबाट स्वीकृत भइसकेको र बजेट समेत विनियोजन गरिएको जनाएको छ।
यसअघि बुद्धि विकास मण्डल र नेपाल क्षयरोग निवारण संघले प्रयोग गर्दै आएको संरचना पोखरीको डिलमै भएकाले हटाइएको महानगरले जनाएको छ।
स्थानीय सरकार सञ्चालन ऐन, २०७४ र मुलुकी देवानी संहिता अनुसार सार्वजनिक सम्पत्ति संरक्षण गर्ने दायित्व स्थानीय तहको भएकाले, स्वेच्छाले नहटाइएका संरचना महानगरपालिकाले आफैं हटाउने तथा खर्च सम्बन्धित निकायबाट असुल गर्ने जानकारी समेत दिइएको छ।
