रातो मच्छिन्द्रनाथ र मिननाथको जात्रा समापनको अवसरमा ललितपुर महानगरपालिकाका मेयर चिरीबाबु महर्जनले सप्तपातल पोखरीमा आयोजित कार्यक्रममा सम्बोधन गर्दै जात्राको सांस्कृतिक महत्त्व र यसले ललितपुरको पहिचानमा थपेको गौरवको विषयमा चर्चा गरे।
उनले जात्रालाई व्यवस्थित र प्रभावकारी रूपमा सम्पन्न गर्न स्थानीय समुदाय, जात्रा व्यवस्थापन समिति, र स्वयंसेवकहरूको भूमिका अत्यन्तै प्रशंसनीय रहेको बताए। मेयर महर्जनले सप्तपातल पोखरीजस्तो ऐतिहासिक स्थलले धार्मिक, सांस्कृतिक, र सामाजिक महत्त्व बोकेको हुँदा यसको संरक्षण र प्रवर्द्धनलाई महानगरपालिकाले आफ्नो प्राथमिकतामा राखेको जानकारी गराए।
उनले जात्राको समापनसँगै यस परम्परालाई निरन्तरता दिन आवश्यक कदम चाल्नुपर्नेमा जोड दिंदै, सम्पदाको संरक्षणमा स्थानीय तहको मात्र नभई सबैको सहकार्य अपरिहार्य रहेको बताए। साथै, उनले ललितपुरलाई सांस्कृतिक पर्यटनको गन्तव्यका रूपमा विश्वभर चिनाउन जात्रा, पर्व, र सम्पदालाई प्रवर्द्धन गर्ने प्रतिबद्धता व्यक्त गरे।
