ललितपुर । ललितपुर उद्योग वाणिज्य संघको युवा तथा महिला उद्यमशील विकास समितिद्वारा आयोजित ई–कमर्श (डिजिटल मार्केटिङ्ग) तालिमको उद्घाटन कार्यक्रम सम्पन्न भएको छ । कार्यक्रममा प्रमुख अतिथिका रूपमा मंजली शाक्य बज्राचार्यको उपस्थिति रहेको थियो भने कार्यक्रमको सभापतित्व संघका अध्यक्ष विश्वराज बज्राचार्यले गर्नुभएको थियो । कार्यक्रममा संघका उपाध्यक्ष, पदाधिकारी, व्यवसायी तथा सम्बन्धित निकायका प्रतिनिधिहरूको उल्लेखनीय उपस्थिति रहेको थियो ।
कार्यक्रमको सुरुवातमा अध्यक्ष विश्वराज बज्राचार्यले स्वागत मन्तव्य राख्दै वर्तमान समय डिजिटल प्रविधिको युग भएकाले व्यवसायलाई पनि आधुनिक प्रविधिसँग जोड्न आवश्यक रहेको बताउनुभयो । उहाँले ई–कमर्श र डिजिटल मार्केटिङ्गले स्थानीय उत्पादन तथा सेवाको बजार विस्तारमा महत्वपूर्ण भूमिका खेल्ने उल्लेख गर्दै युवा तथा महिला उद्यमीलाई आत्मनिर्भर र प्रतिस्पर्धी बनाउन यस्ता तालिम उपयोगी हुने धारणा व्यक्त गर्नुभयो ।
तालिमकी प्रशिक्षक कमला लामाले ई–कमर्शको आधारभूत अवधारणा, डिजिटल बजारको सम्भावना, सामाजिक सञ्जालमार्फत व्यवसाय प्रवर्द्धन, अनलाइन ब्राण्डिङ्ग तथा आधुनिक व्यापार प्रविधिबारे सहभागीहरूलाई जानकारी दिनुभएको थियो । उहाँले डिजिटल माध्यमको सही प्रयोगबाट साना तथा मझौला व्यवसायलाई समेत अन्तर्राष्ट्रिय बजारसम्म पुर्याउन सकिने बताउनुभयो ।
प्रमुख अतिथि उपमेयर मंजली शाक्य बज्राचार्यले मन्तव्य राख्दै तालिम केवल प्रमाणपत्रका लागि नभई व्यवहारिक ज्ञान र सीपका लागि लिनुपर्नेमा जोड दिनुभयो । उहाँले “तालिम लिँदा कति पैसा आउँछ भनेर नसोच्नुस्, तालिमलाई फोकस गर्नुस् । सर्टिफिकेट मात्र लिनुको कुनै औचित्य छैन,” भन्दै तालिमपछि त्यसको सदुपयोग हुनुपर्ने महानगरपालिकाको सोच रहेको बताउनुभयो ।
उहाँले स्थानीय उत्पादन, संस्कृति तथा बजारको माग बुझेर मात्रै डिजिटल व्यापारमा सफलता हासिल गर्न सकिने उल्लेख गर्दै “कल्चरल्ली के छ भनेर मार्केट बुझ्न जरुरी छ । डिजिटल मार्केट भनेको कुनै बाउन्ड्रीले छेक्दैन,” भन्नुभयो । उहाँले प्रविधिको प्रयोगमार्फत स्थानीय उत्पादनलाई विश्व बजारसम्म पुर्याउन सकिने बताउँदै उद्यमशीलता विकासमा महानगरपालिकाले आवश्यक सहयोग गर्ने प्रतिबद्धता व्यक्त गर्नुभयो ।
कार्यक्रमको अन्त्यमा संघका उपाध्यक्ष सुसन महर्जनले धन्यवाद मन्तव्य व्यक्त गर्दै तालिमबाट प्राप्त ज्ञानलाई व्यवहारमा लागू गरी व्यवसायलाई डिजिटल माध्यमसँग जोड्न सहभागीहरूलाई आग्रह गर्नुभयो ।
उक्त कार्यक्रमको सञ्चालन भुमिनन्दन कर्माचार्यले गर्नुभएको थियो ।
