ललितपुर/ २५ माघ — नेपाली कांग्रेसका केन्द्रीय सदस्य मदनबहादुर अमात्यले देशको समग्र राजनीतिक माहोललाई नेतृत्व गर्न र मुलुकलाई सही दिशा दिन सक्ने क्षमता नेपाली कांग्रेससँग मात्रै रहेको स्पष्ट गर्नुभएको छ।
नेपाली कांग्रेस ललितपुर प्रतिनिधिसभा निर्वाचन क्षेत्र नं. ३ द्वारा आयोजना गरिएको ललितपुर महानगरपालिका वडा नं. २६ र २७, सुनाकोठीमा सम्पन्न क्रियाशील सदस्य भेला तथा निर्वाचन परिचालन समितिको बैठकलाई सम्बोधन गर्दै केन्द्रीय सदस्य अमात्यले वर्तमान राजनीतिक परिस्थितिमा नेपाली कांग्रेसको जित अनिवार्य रहेको बताउनुभयो। उहाँले लोकतन्त्रको संरक्षण, संविधानको कार्यान्वयन र देशको स्थायित्वका लागि कांग्रेसको भूमिका निर्णायक हुने उल्लेख गर्नुभयो।
“अहिले देश विभिन्न चुनौती र अन्योलको अवस्थामा छ। यस्तो बेला देशको सम्पूर्ण माहोललाई नेतृत्व गर्नसक्ने र जनतालाई सही दिशामा अघि बढाउन सक्ने शक्ति नेपाली कांग्रेस मात्रै हो,” अमात्यले भन्नुभयो।
उहाँले पार्टीभित्रको एकता र संगठनात्मक अनुशासनलाई बलियो बनाउन सबै कार्यकर्तालाई आग्रह गर्दै उम्मेदवारभन्दा पनि पार्टीको चिन्ह र सिद्धान्तलाई जिताउनुपर्नेमा जोड दिनुभयो।
“उम्मेदवार को व्यक्ति छ भन्ने धेरै चिन्ता हामीलाई छैन। हामीले रुखलाई जिताउने हो। रुख जिते हामी सबै जित्छौं, रुखले हार्दा हामी सबै हार्छौं,” उहाँले स्पष्ट पार्नुभयो।
कार्यक्रममा ललितपुर क्षेत्र नं. ३ बाट प्रतिनिधिसभा सदस्यका उम्मेदवार नेपाली कांग्रेस ललितपुरका सभापति जितेन्द्र कुमार श्रेष्ठ रहेको जानकारी गराइयो। निष्कलंक व्यक्तित्व, इमानदार छवि र हक्की स्वभावका धनी श्रेष्ठलाई तर्कशील, क्षमतावान तथा जनतासँग नजिक रहने राजनीतिज्ञका रूपमा चिनाउँदै वक्ताहरूले उहाँको जितले क्षेत्र र देशको समग्र विकासमा सकारात्मक योगदान पुग्ने विश्वास व्यक्त गरे।
भेलामा पार्टीका स्थानीय नेता तथा कार्यकर्ताहरूको उल्लेख्य सहभागिता रहेको थियो। सहभागीहरूले निर्वाचनलाई लक्षित गरी घरदैलो अभियान, संगठन सुदृढीकरण र मतदाता अभिमुखीकरणलाई अझ प्रभावकारी बनाउने प्रतिबद्धता व्यक्त गरेका थिए।
