ललितपुर, असोज २९ —
आफ्नो कलाकारिता र अद्वितीय प्रतिभाद्वारा समाजमा गहिरो छाप छोड्दै जीवनको कठिन यात्रामा पनि कलाको साधनामा समर्पित कलाकार स्वतन्त्र संसार महर्जन गत असार २८ गते अकस्मात् निधन भएका थिए। “दैवको लीला अपरम्पार” भन्ने भनाइझैं, उनी असाध्य रोगसँग लामो समयदेखि संघर्ष गर्दै पनि ह्वीलचेयर र सहयोगीको सहायतामा निरन्तर कलाको यात्रामा सक्रिय रहेका थिए।
महर्जनले आफ्नो जीवनकालमै आत्मवृत्तान्त लेखनको थालनी गरेका थिए। उक्त कृति लेखक दिपक विवश ‘आँशु’ द्वारा लेखिएको हो, जसको शीर्षक “स्वतन्त्र संसार महर्जन (झीरमा उनेको मान्छे)” राखिएको छ। लेखक आँशुका अनुसार, यो कृति केवल आत्मकथा मात्र नभई “युग नायक अमर कलाकार”को जीवन परिचय र प्रेरणाको स्रोत हो। उनले भने, “यो उपाधि कुनै कल्पना होइन, सत्यताको परिचायक हो।”
स्वतन्त्र संसार महर्जनले संसार क्रियसन्स नेपाल र संसार्स संगीतालय जस्ता संस्थामार्फत नेपाली कलाकारिता क्षेत्रमा उल्लेखनीय योगदान दिएका थिए।
स्वर्गीय कलाकार महर्जनको आत्मवृत्तान्त “स्वतन्त्र संसार महर्जन (झीरमा उनेको मान्छे)” को लोकार्पण समारोह आगामी ने.सं. ११४५ कौलागा त्रयोदशी (कार्तिक २ गते, आइतवार) का दिन ललितपुरको खोकना क्याटरिङ पार्टी भेन्यू, कार्यविनायक, बुंगमतीमा बिहान ११ बजे आयोजित हुने भएको छ।
