ललितपुरः जेन्जीदेखि वृद्धासम्म सबै पुस्तालाई समेट्ने प्रयास — धोबीघाटमा साइकलमैत्री आकाशे पुल निर्माण सुरु
ललितपुर महानगरपालिकाले जेन्जी पुस्तादेखि वृद्धासम्म सबै नागरिकलाई सुविधा र सुरक्षा दिने उद्देश्यसहित चक्रपथस्थित धोबीघाटमा साइकलमैत्री आकाशे पुल निर्माण सुरु गरेको छ ।
आइतबार ललितपुर महानगरका नगर प्रमुख चिरीबाबु महर्जनले पुल निर्माणको शिलान्यास गर्दै सुरक्षित, स्वच्छ र साइकलमैत्री सहर निर्माण महानगरको प्राथमिकता भएको बताए ।
कार्यक्रममा बोल्दै शुसासन तथा संस्थागत विकास समितिका संयोजक तथा वडा नं. ३ का वडा अध्यक्ष श्रीगोपाल महर्जनले स्थानीय तह नै नागरिकको मर्म बुझ्ने सरकार भएको उल्लेख गर्दै, “जेन्जीदेखि वृद्धासम्म सबै पुस्ताको हितका लागि महानगरले ठोस कदम चाल्दै आएको छ,” भने ।
महानगरका अनुसार धोबीघाट क्षेत्र चक्रपथको व्यस्त भाग भएकाले पैदलयात्री र साइकल प्रयोगकर्ताको सुरक्षाका लागि आकाशे पुल निर्माण गर्न लागिएको हो ।
नगर प्रमुख महर्जनले भने, “सडक सुरक्षित नभएकै कारण यहाँ एक दर्जनभन्दा बढी मानिसको ज्यान गइसकेको छ, दुर्घटना हुन नदिन र यात्रुहरूको सुरक्षा सुनिश्चित गर्न हामीले यो पुल बनाउन थालेका हौँ।”
