ललितपुर भाद्र १८ -ः नेवा सभ्यता र सँस्कृतिको संरक्षण तथा पुनर्जीवनका लागि महत्वपूर्ण कदम स्वरूप, लोंल टोलमा आकाश भैरव (हाथो भैलः आजु) को प्रतिमा पुनःस्थापना कार्य औपचारिक रूपमा यहि आउँदो भाद्र २१ गते शनिबार र भाद्र २२ गते आईतबारका दिन विशेष पूजाआजा गरी सु-सम्पन्न हुने जानकारी गराउन पाउँदा हामी अत्यन्त हर्षित छौं । यो कार्यक्रम लोंल टोल सुधार समिति र लोंल युवालयको सहकार्य र समन्वयमा आयोजना हुँदैछ ।
काठमाण्डौं उपत्यकाको करिब तीन हजार वर्ष पुरानो इतिहास बोकेको आकाश भैरव पूजा नेवा समुदाय, विशेषतः ज्यापु जातिको मौलिक परम्परा हो, जसले इन्द्र जात्रा (येंयाः पुन्ही) को अवसरमा विशेष महत्व पाएको छ । यही गौरवशाली परम्परा लोंल टोलमा पनि करीब २ शताब्दी अघि रहेको थियो भन्ने कुरा अघिल्ला पुस्ताले वर्णन गर्दथे । यद्यपि समय र परिस्थितिवश यो परम्परा कालान्तरमा लोप हुँदै गयो । यसरी हराउँदै गएको ऐतिहासिक, धार्मिक र सांस्कृतिक सम्पदालाई पुनर्जीवित गर्दै, यसै वर्षदेखि निरन्तरता दिने लक्ष्यसाथ प्रतिमा निर्माण कार्य समाप्त गरी यस वर्षको इन्द्रजात्राको सुअवसरका दिन स्थापना गरिनेछ ।
यस धार्मिक कार्यको कुल अनुमानित लागत रु. २५,००,०००।- (पच्चीस लाख रुपैंया मात्र) रहेको छ । यसको लागि लोंल टोल सुधार समिति र लोंल युवालयले आह्वान गरेको कोष संकलन अभियानमा मुख्यतः स्थानीय टोलबासीहरूले नै स्वेच्छिक रुपमा आर्थिक योगदान गरेका छन् । यस बाहेक अन्य शुभेच्छुक तथा धार्मिक आस्थावान महानुभावहरूले पनि आ-आफ्नो गच्छे र इच्छा अनुरुप थप सहयोग गर्नु भएको छ ।
यसरी छोटो अवधिमै आवश्यक कोष स्थानीय तहबाट नै संकलन गरी लॉल टोल सुधार समिति र लोंल युवालयको संयुक्त प्रयासमा आयोजना हुने यस कार्यले हाम्रो टोलको मौलिक पहिचान पुनः स्थापित गर्दै संस्कृति जगेर्ना गर्न उल्लेखनीय योगदान पुऱ्याउनेछ भन्नेमा हामी विश्वस्त छौं। साथै यस ऐतिहासिक कार्यमा प्रत्यक्ष र अप्रत्यक्ष रुपमा योगदान गर्नु हुने सम्पूर्णप्रति हामी हृदयदेखि कृतज्ञ छौ ।
लॉल टोल सुधार समिति र लोंल युवालय (लॉल टोल आकाश भैरव पुनःस्थापना व्यवस्थापन समिति)
२०८२ भाद्र १७ गते बुधबार (ने.सं. ११४५ अंलाथ्व एकादशी)
युवालय
