भक्तपुर, साउन ५ — भक्तपुरमा आधारित प्रतिष्ठित साहित्यिक संस्था नेपाल साहित्य मन्दिरले यस वर्षको जरिमैंया साखः लुमन्ति सिरपा पुरस्कार साहित्यकार सुलोचना मानन्धर धिताललाई प्रदान गर्ने घोषणा गरेको छ।
नेपालभाषा साहित्यमा दीर्घ योगदान पुर्याउँदै आउनुभएकी मानन्धरलाई दिइने यो सम्मान महिला स्रष्टालाई प्रदान गरिने विशेष पुरस्कार हो।
त्यस्तै, पुरुष स्रष्टाका लागि दिइने कुमार साखः हःपाः सिरपा पुरस्कार यस वर्ष विजयरत्न असंबरेलाई प्रदान गरिनेछ। असंबरे नेपालभाषा साहित्य तथा सञ्चार क्षेत्रमा लामो समयदेखि क्रियाशील रहँदै आएका छन्।
नेपाल साहित्य मन्दिरका अध्यक्ष तथा नेपाल प्रज्ञा–प्रतिष्ठानका प्राज्ञ त्रैलोक्यमान बनेपालीका अनुसार, यी दुवै सम्मान आगामी गुंलाथ्व द्वितिया (साउन १० गते, शनिबार) भक्तपुरको भार्भाचोस्थित तिसा रेष्टुरेण्टमा आयोजित विशेष समारोहमा प्रदान गरिनेछ।
सो अवसरमा नेपालभाषाका वरिष्ठ भाषिक अभियन्ता छत्रबहादुर कायस्थलाई पनि विशिष्ट साहित्य सम्मान ११४५ बाट सम्मान गरिने कार्यक्रम रहेको छ।
आयोजक संस्थाले समारोहलाई भव्य र गरिमामय बनाउन सम्पूर्ण भाषाप्रेमी तथा साहित्यप्रेमीहरूलाई उपस्थित भई सफल पार्न हार्दिक आह्वान गरेको छ।
