१६ वडाय् नेपाललिपि व नेपालभाषा अनिवार्य

यल महानगरपालिका १६ वडादुने पलिस्था जुयाच्वंगु सरकारी वा गैर सरकारी ज्याकुथि, नीजि संघसंस्था, खलःपुचः, टोल समिति, गुथि, विहार, स्कूल, बैंक, सहकारी, स्वास्थ्य सेवा व व्यवसायिक पसः, ज्यासः आदि दक्वया साइनबोर्ड, बिल, लेटरप्याडय् नेपाललिपि (प्रचलित नेपाललिपि वा रञ्जना लिपि) अनिवार्यरुपं छ्यलेमाःगु व थाय्+या नां नं मौलिक नेपालभाषां हे दुथ्याकेगु खँय् थौं छगू विशेष मुँज्या जूगु दु ।
ललितपुर उद्योग वाणिज्य संघ मंगलय् जूगु विशेष मुँज्याय् नेपालभाषा मंकाः खलः, ललितपुर सुन चाँदी व्यवसायी संघ, ललितपुर हस्तकला संघ, नेवाः (स्यनेकुथि) प्रशिक्षण केन्द्र, लोक साहित्य परिषद, मणिगल साकोस, यल नेवाः समाज, स्यःस्यः समाज, ज्यापु समाज यल लिसें थीथी टोल सुधार समिति, विहार आदिपिनिगु उपस्थिति दुगु खः । यल महानगरपालिका १६ वडाया अध्यक्ष निर्मलरत्न शाक्यया नायःसुइ जूगु मुँज्याय् अध्यक्ष भाजु लिपि व भाषा छ्यलेगु तातुनाय् जः व्हलाः नेवाः (स्यनेकुथि) प्रशिक्षण केन्द्रया हामाभाजु रुबिन शाक्यं नेपालभाषा व नेपाललिपिया खँ कँसें साइनबोर्ड, लेटरप्याड व बिलय् गुकथं नेपाललिपि व नेपालभाषा दुथ्याकेफइ धइगु खँय् छगू स्लाइ प्रस्तुत याःगु खः । ज्याझ्वलय् पुष्पराज राजकर्णिकार, नेपालभाषा मंकाः खलः यलया पुलांम्ह नायः सुरेश प्रधान, नेपालभाषा मंकाः खलः यल नायः हिराकाजी महर्जन, बौद्धविद्वान किरण नरसिं शाक्य, यल नेवाः समाजया नायः बिनोद ताम्रकार, थुगुसीया मिस नेवाः प्रलिशा शाक्य आदिपिनिसं नेपाललिपि व नेपालभाषा छ्यलेगु खँय् थःथः बिचाः व सुझाव बियादीगु खः ।
थुगु १६ वडां न्ह्याकूगु पलाःयात ब्वतिकाःपिं दक्व संघसंस्थां समर्थन यासें थःपिनिगु अन्तर्गत दुगु संस्थायात उगु हे कथं नेपाललिपि व नेपालभाषा छ्यय्‌केबीगु बचं नं बियादीगु दु । १६ वडाय् साइनबोर्ड, बिल, लेटरप्याडय् नेपाललिपि व नेपालभाषा अनिवार्यकथं दुथ्याकेगु ज्यां नेपाललिपि व नेपालभाषा ल्यनाच्वनीगु व अझ महत्व दयावइगु खँ स्पष्ट जूगु दु । १६ वडापाखें थ्वहे वइगु २०८२ असार मसान्ततक दुने नेपालभाषा व नेपाललिपि दुथ्याकेगु ज्या पूवंकेमाःगु सुचं वैशाख २३ गते न्हापांगु सुचं ब्यूगु ख : । थुगु ज्याखँ पूवंकेत व पूवंकेबीया निंतिं सकल वडावासीपिनित दुनुगलंनिसें इनाप याःगु दु । थ्वहे वइगु आ.व २०८२/०८३ निसें न्हूगु व्यवसाय/संघसंस्था दर्ता व नविकरण याय्‌या निंतिं नेपाललिपि व नेपालभाषा अनिवार्यरुपं छ्यलेमाःगु खँया जानकारी वडा अध्यक्ष निर्मलरत्न शाक्यं बियादीगु दु । उगु हे मुँज्याय् पाटन दरवार क्षेत्र सम्पदा क्षेत्र जूगुलिं आधुनिक फ्लेक्स व झिलमिल मतया साइनबोर्डया थासय् हस्तकलां जाःगु सिँ, पाताया साइनबोर्ड तय्‌केगु खँ नं न्ह्यःने न्ह्यथंगु दु ।