यल, असार १४ — नेवाः पत्रकार राष्ट्रिय दबू यल कचाया शनिवाः यलय् जूगु न्याक्वःगु तःमुँज्यां मञ्जु बज्राचार्ययात सर्वसम्मतिया अध्यक्ष पदय् नायः कथं ल्यःगु दु।
तःमुँज्यां पत्रकार दबू यल कचाया झिंप्यक्वःगु दँ मुँज्या नं सम्पन्न जूगु दु। दँ मुँज्याय् यल जिल्लाया थीथी सक्रिय संचारकःमिपिंया सहभागिता जूगु खः। तःमुँज्यां दबूया आगामी कार्यदिशा, पत्रकारिताया व्यावसायिक विकास, नेपाल भाषाया पत्रकारिता सुदृढ यायेगु व संगठन विस्तारया विषयय् छलफल यानागु दु।
न्याक्वःगु कार्यसमितिय् न्वकू (उपाध्यक्ष) पदय् लक्ष्मीकुमारी श्रेष्ठ व बि.के. जल्मी (बाबु काजी महर्जन) ल्यःगु दु। अथेहे छ्यान्जे (सचिव) पदय् पवित्रकुमार महर्जन, लिउ छ्यान्जे (सहसचिव) पदय् विनोद महर्जन तथा दाँभरि (कोषाध्यक्ष) पदय् कल्पना महर्जनयात सर्वसम्मतिया ल्यःगु दु।
अथेहे ज्यासना पुचः (सदस्य) पदय् हर्कबहादुर श्रेष्ठ, बिक्रम खडगी, रेगीशा महर्जन, रजत शाही, बिक्रम महर्जन व रामराजा बज्राचार्यपिन्त सर्वसम्मतिया चयन यानागु दु।
नव निर्वाचित कार्यसमितियात तःमुँज्यां सहभागी पत्रकारकःमिपिंन्ह्यः बधाई तथा सफल कार्यकालया शुभकामना यानागु दु। नव कार्यसमितिय् नेपाल भाषाया पत्रकारिता संरक्षण, प्रवर्द्धन, पत्रकारकःमिपिंया क्षमता अभिवृद्धि तथा संगठन सुदृढीकरणय् विशेष जोड यानागु प्रतिबद्धता व्यक्त यानागु दु।
