चितवन असोज २ -ः नेपाली केरा उत्पादक किसानहरूले असोज ६ गतेपछि भारतीय केरा आयात पूर्ण रूपमा बन्द गर्न माग गरेका छन्। बोटमै पाकेर कुहिन थालेको अवस्थाले बजार संकट उत्पन्न भएपछि नेपाल केरा उत्पादक महासंघले यो अल्टिमेटम दिएको हो।
महासंघका अनुसार किसानहरू प्रतिकिलो ३–४ रुपैयाँमै केरा बेच्न बाध्य छन्। वार्षिक करिब ६ लाख मेट्रिक टन उत्पादन हुने नेपालकै उत्पादन आन्तरिक माग धान्न पर्याप्त भए पनि भारतीय केरा सस्तो मूल्यमा आयात हुँदा नेपाली किसान मारमा परेको गुनासो गरिएको छ।
बर्दियालगायतका किसानहरूले भारतीय केराले बजार ओगट्दा आफ्ना उत्पादन बेच्नै नसक्ने अवस्था आएको बताएका छन्। आयात रोक्ने माग पूरा नभएमा सडकमै उत्रिने चेतावनी समेत महासंघले दिएको छ।
