ललितपुर भाद्र १३ -ः ललितपुर महानगरपालिका–१६”, ईखालखुस्थित भजन मन्डल चोकको पाटी जीर्ण बन्दै गएको छ । लाखौँ मानिस ओहोरदोहोर गर्ने व्यस्त चोकमा रहेको यो पाटी भत्किनै लागेको अवस्थामा पुगेको छ ।
स्थानीयवासीका अनुसार लामो समयदेखि संरक्षण, मर्मत र जीर्णोद्धारको काम नहुँदा पाटीको ढलान, काठका स्तम्भ र छाना कमजोर भइसकेका छन् । भीडभाड हुने क्षेत्रमा रहेको पाटी कुनै बेला यात्रु तथा बटुवाहरूलाई विश्राम दिने महत्वपूर्ण सार्वजनिक स्थलका रूपमा परिचित थियो ।
सम्पदामैत्री शहरका रूपमा परिचित ललितपुरमा यस्तो ऐतिहासिक पाटी संरक्षणविहीन हुँदा स्थानीयले चिन्ता व्यक्त गरेका छन् । उनीहरूका अनुसार पाटी तत्काल मर्मत नहुँदा कुनै दिन ठुलो दुर्घटना निम्तिन सक्ने खतरा बढेको छ ।
