काठमाडौं भदौ ६ —ः
त्रिभुवन विश्वविद्यालयअन्तर्गत संस्कृत केन्द्रीय विभागमा सञ्चालित एक वर्षे पीजी डिप्लोमा इन योग साइन्स (PGD in Yoga Science) कार्यक्रममा प्रथम र दोस्रो सेमेष्टरमा उत्कृष्ट परिणाम हासिल गर्ने विद्यार्थीहरूलाई ललितपुर महानगरपालिकाले जनही रु ५० हजार नगद पुरस्कारसहित सम्मान गरेको छ।
पुरस्कृत विद्यार्थीहरूमा, पहिलो सेमेष्टरमा प्रथम स्थान हासिल गरेकी वडा नं. १४ की अञ्जु श्रेष्ठ तथा दोस्रो सेमेष्टरमा प्रथम भएका वडा नं. १ का सनतकुमार न्यौपाने रहेका छन्।
महानगरले विगत वर्ष २९ वटै वडाबाट १/१ जना विद्यार्थी छनोट गरी प्रतिविद्यार्थी रु १ लाख छात्रवृत्ति दिई उक्त कोर्स अध्ययनको अवसर प्रदान गरेको थियो। सो वर्ष कूल ३५ जना विद्यार्थी अध्ययनरत थिए।
ललितपुरमा आयोजित सम्मान कार्यक्रममा प्रमुख अतिथि ललितपुर महानगरपालिकाका प्रमुख चिरिबाबु महर्जन, त्रिविका उपकुलपति प्रा. डा. दीपक अर्याल, संस्कृत विभाग प्रमुख प्रा. डा. नारायण प्रसाद गौतम, विद्यार्थी नेता ज्ञानभक्त डंगोल लगायतको उपस्थिति रहेको थियो।
कार्यक्रममा सहभागीहरूले योग विज्ञान जस्तो शारीरिक, मानसिक र नैतिक विकासमा सहयोगी विषय अध्ययनमा स्थानीय सरकारको सहयोगप्रति आभार प्रकट गर्दै भविष्यमा अझ प्रभावकारी कार्यक्रमको अपेक्षा व्यक्त गरेका थिए।
