ललितपुर, भदौ ५ –
ललितपुर महानगरपालिका वडा नं. ४ कार्यालयको आयोजनामा सम्पन्न नेपाली महिलाहरूको महान चाड तिज विशेष जनचेतना तथा क्षमता अभिवृद्धि कार्यक्रममा माननीय युवा तथा खेलकुद मन्त्री उर्मिला नेपालले महिलाको सामाजिक सशक्तीकरणमा तिज पर्वले खेल्ने भूमिकालाई विशेष रूपमा उल्लेख गर्नुभयो।
उहाँले आफ्नो सम्बोधनमा भन्नुभयो,
“तिज हाम्रो सांस्कृतिक पहिचान मात्र होइन, अब यो महिला अधिकार, चेतना र आत्मसम्मानको पर्व पनि हो। परम्परा र आधुनिकताको समिश्रणमार्फत तिजलाई समाज रूपान्तरणको अभियानमा बदल्नु आवश्यक छ।”
मन्त्री नेपालले महिला नेतृत्व विकास, खेलकुदमा सहभागिता तथा उद्यमशीलतालाई प्रोत्साहन गर्दै यस्ता कार्यक्रमहरू स्थानीय तहमै प्रभावकारी रूपमा सञ्चालन हुनु सकारात्मक संकेत भएको बताउनुभयो।
कार्यक्रमको सफल संयोजन ललितपुर महानगरपालिका वडा नं. ४ का अध्यक्ष श्री सन्तोष खड्काले गर्नुभएको थियो। अध्यक्ष खड्काले तिज पर्वको सांस्कृतिक र सामाजिक पक्षको महत्व औंल्याउँदै भन्नुभयो,
“वडास्तरीय यस्ता कार्यक्रमहरूले समुदायमा चेतना फैलाउने मात्र होइन, महिलाहरूको आत्मविश्वास र सामूहिक एकतालाई बलियो बनाउने भूमिका खेल्दछ।”
कार्यक्रममा स्थानीय महिलाहरूको उल्लेखनीय सहभागिता रह्यो। उनीहरूले तिज सम्बन्धी गीत, नृत्य तथा प्रेरणादायक प्रस्तुतिहरूमार्फत महिला सशक्तीकरणको सन्देश प्रवाह गरेका थिए।
