ललितपुर, साउन ३० –
ललितपुर महानगरपालिकाले शैक्षिक सत्र २०८१ को माध्यमिक शिक्षा परीक्षा (एसइई) मा उच्चतम अंक प्राप्त गर्ने ८६ जना विद्यार्थीलाई एक भव्य कार्यक्रमका बीच सम्मानसहित नगद पुरस्कार प्रदान गरेको छ।
महानगरले २२ वटा संस्थागत विद्यालयका ७८ विद्यार्थी र ६ वटा सामुदायिक विद्यालयका ८ विद्यार्थीलाई सम्मानित गरेको हो। संस्थागत विद्यालयतर्फ ४.०० जिपिए प्राप्त गर्ने र सामुदायिक विद्यालयतर्फ ३.९५ जिपिएभन्दा माथि ल्याउने विद्यार्थीहरू छनोटमा परेका थिए।
कार्यक्रममा सामुदायिक र संस्थागत क्षेत्रका प्रत्येक विद्यार्थीलाई २ लाख रुपैयाँ र सामुदायिक विद्यालयलाई ४ लाख रुपैयाँ प्रदान गरिएको हो।
विशेष उपलब्धि हासिल गर्ने विद्यालयहरूमा धापाखेलस्थित जेम्स स्कुलका १६ जना विद्यार्थी ४.०० जिपिए सहित र बुङमतीस्थित आदर्श सौल युवक माविका ३ मध्ये १ जनाले ४.०० जिपिए र २ जनाले ३.९६ प्राप्त गरेका थिए।
उत्तीर्ण प्रतिशत विवरण:
- समग्र महानगर: ९१.५१%
- संस्थागत विद्यालय: ९४.९०%
- सामुदायिक विद्यालय: ८१.०५%
🔹 महानगर प्रमुख चिरीबाबु महर्जनले ललितपुरलाई “शिक्षाको हब” सावित गर्ने विद्यार्थीकै सफलता भएको बताउँदै, कोरोनापछिको शैक्षिक पुनरुत्थानमा पुरस्कार कार्यक्रम प्रेरणादायी बनेको उल्लेख गरे।
🔹 उपप्रमुख मञ्जली शाक्य बज्राचार्यले विद्यार्थीहरूलाई जीवनका थप चुनौतीका लागि तयार रहन सुझाउँदै अझ उचाइ चुम्न शुभकामना
🔹 प्रमुख प्रशासकीय अधिकृत रेखा दास श्रेष्ठले सफलता विद्यार्थी, विद्यालय र अभिभावकको संयुक्त मिहेनतको परिणाम भएको बताउँदै, चुनौतीसँग जुझ्ने क्षमता विकासको आवश्यकता औंल्याइन्।
🔹 प्रवक्ता तथा सामाजिक विकास संयोजक राजु महर्जनले कोभिडपछि सुरु गरिएको सम्मान–पुरस्कार कार्यक्रमले शैक्षिक गुणस्तरमा सकारात्मक प्रभाव पारेको बताए।
🔹 जिल्ला समन्वय समितिका सभापति ऋषिदेव फुँयाल र प्रमुख जिल्ला अधिकारी रमेश ढकालले महानगरको अभ्यासलाई अनुकरणीय बताउँदै विद्यार्थीलाई जिम्मेवार र इमानदार बन्ने प्रेरणा प्रदान गरे।
कार्यक्रममा पुरस्कृत विद्यार्थी र अभिभावकहरू पनि बोल्दै महानगरप्रतिको आभार प्रकट गरेका थिए।
