काठमाडौं, साउन १९ —
राष्ट्रिय परीक्षा बोर्डले कक्षा १२ को नतिजा आज सोमबार सार्वजनिक गरेको छ। सार्वजनिक नतिजाअनुसार ६१.१७ प्रतिशत विद्यार्थी उत्तीर्ण भएका छन् भने ३८.८३ प्रतिशत विद्यार्थी नन-ग्रेड (NG) भएका छन्।
यस वर्ष परीक्षा ११ बैशाखदेखि सुरु हुने तालिका भए पनि आन्दोलनका कारण परीक्षा २१ बैशाखबाट सुरु भएको थियो। परीक्षामा देशभरबाट ५ लाख ११ हजार ५ सय २५ जना परीक्षार्थी सहभागी भएका थिए।
बोर्डका अध्यक्ष महाश्रम शर्माले नतिजा सार्वजनिक गर्ने क्रममा पूरक परीक्षासम्बन्धी जानकारी पनि दिएका छन्। उनका अनुसार, आगामी भाद्र २८ र २९ गते ग्रेड सुधार (पूरक) परीक्षा सञ्चालन हुने भएको छ। पूरक परीक्षामा अधिकतम दुई विषयमा ‘D+’ भन्दा कम ग्रेड प्राप्त गरेका विद्यार्थी सहभागी हुन सक्नेछन्।
