आज श्रावण शुक्ल पञ्चमीका दिन नेपालभर नागपञ्चमी पर्व परम्परागत र धार्मिक विधिअनुसार मनाइँदैछ। साउन महिना अधिकमास परेकाले यो वर्ष यो पर्व भदौ महिनामा परेको हो। नागपञ्चमीको दिन घरको मूल ढोकामा नागको चित्र टाँसी, नाग–सर्पको पूजा गरी विभिन्न परिकारहरू चढाउने गरिन्छ।
धार्मिक विश्वास अनुसार, यसरी पूजा गरेपछि वर्षभर घरमा नाग, सर्प, बिच्छी जस्ता जीवले दुःख नदिने, साथै अग्नि, चट्याङ र बाढी जस्ता प्राकृतिक प्रकोपबाट पनि सुरक्षा प्राप्त हुने मानिन्छ।
पूजामा गाईको दूध, दुबो, अक्षता, खीर, रोटी आदि चढाइन्छ भने नागको चित्र ढोकामा टाँसिन्छ। पूजा गर्न सकिने प्रमुख स्थलहरूमा काठमाडौँको नागपोखरी, टौदह, र भक्तपुरको नाग पोखरी (दुगु हिटी) लगायत देशभरका नागदह, कुण्ड, तथा नाग मन्दिरहरू पर्दछन्।
