ललितपुर महानगरपालिका १६ वडाको आयोजनामा नेपाली कागजको शपिङ्ग ब्याग बनाउने प्रशिक्षण कार्यक्रमको समापन समारोह सम्पन्न भएको छ। यो प्रशिक्षणको उद्देश्य वातावरणमैत्री विकल्पको प्रचार गर्दै प्लास्टिकजन्य प्रदूषणलाई घटाउनु थियो। कार्यक्रममा वडाध्यक्ष निर्मल रत्न शाक्यले कागजको शपिङ्ग ब्यागको महत्व, प्रयोगका फाइदा, र स्थानीय व्यवसायको सम्भावनाबारे प्रकाश पार्नुभयो।
उहाँले भन्नुभयो:
कागजको शपिङ्ग ब्याग प्लास्टिकको तुलनामा वातावरणमैत्री हुन्छ।
यसले जैविक रूपले कुहिन सक्ने भएकाले भूमि प्रदूषण र जल प्रदूषणलाई न्यूनिकरण गर्न मद्दत गर्दछ।
स्थानीय रूपमा उत्पादन हुँदा यसले रोजगारी सिर्जना गर्न र स्थानीय कच्चा पदार्थको प्रयोग बढाउन सहयोग पुर्याउँछ।
वातावरणीय सचेतना बढाउन यस्ता कार्यक्रमहरू निरन्तर हुनुपर्ने आवश्यकता औंल्याउनुभयो।
समापन समारोहमा सहभागीहरूले आफूले सिकेका सीपहरूमार्फत स्थानीय व्यवसाय सुरु गर्ने प्रतिबद्धता व्यक्त गरेका थिए। अध्यक्ष शाक्यले उत्पादन र बजार व्यवस्थापनका लागि महानगरपालिकाबाट आवश्यक सहयोग र कोसेली घर उपलब्ध गराइने पनि बताउनुभयो।
